مصطفى النجار: اعتبروا حوادث الطرق إرهابا

هاجم الدكتور مصطفى النجار، البرلمانى السابق، الحكومة بعد حادث أتوبيس تلاميذ البحيرة، معتبرًا أن الفشل والعجز وسوء إدارة الدولة هو ما يقتل الغلابة.

وكتب النجار، في تدوينة له على موقع التواصل الاجتماعي، "فيس بوك": "بلد رئيس هيئة الطرق فيها طالع يقول إن إصلاح الطرق وصيانتها هيخلى الحوادث تزيد! مستنيين يحصل فيها إيه؟ 28 طفل وطالب فى أسبوع واحد تتحرق جثثهم وتتفحم فى سوهاج والبحيرة، وبرده محدش بيتحاسب ولا بنعرف إيه الخطوة اللى اتاخدت عشان نمنع حدوث الكوارث دى ، وترجع الكوارث تتكرر وبرده بنعمل اننا متفاجئين ونحسبن ونتألم ومفيش تغيير بيحصل ولو حد اتكلم وقال حاسبوا وسائلوا هيطلع الطبالين والمغيبيين يقولك عيب احنا بنحارب الارهاب وبلاش تضعف الروح المعنوية للبلد!".

وأضاف النجار: "طيب اعتبروا حوادث الطرق ارهاب.. واعتبروا موت التلاميذ فى مدارسهم ارهاب.. اعتبروا غرق الناس فى العبارات والمعديات ارهاب.. العدو الأكبر للبلد هو الفشل والعجز وسوء الادارة اللى بيقتل الغلابة".

وتابع النجار: "ليقضى الله أمرا كان مفعولا.. اللهم اجعل دماء التلاميذ الابرياء لعنة على كل فاشل وعاجز ومبرر.. اللهم صبر اهلهم وهم يجمعون أشلاءهم المتفحمة.. اللهم ارفع عنا بلاء لا نطيقه ولا نحتمله.. يارب احفظ مصر وأهلها".

وكان أتوبيس تلاميذ مدرسة الأورمان، بمركز أبو حمص، بمحافظة البحيرة، تفحم، أمس، وأودى بحياة 18 تلميذًا، وأصيب 16 آخرون، بينهم 4 في حالة حرجة، بعد اصطدامه بسيارة ملاكي وسيارة نقل.