كبسولة تربوية : مش مكسوف علي نفسك و انت بتشتري طماطم

بمناسبة صاحبي اللي شافني خارج من عند خُضري و قالي بتهريج "مش مكسوف علي نفسك و انت بتشتري طماطم" ..

- لا مش بتكسف لما بساعد و بنزل اجيب لأمي طلبات للبيت من السوبر ماركت او لما بشتري كوسة ولا طماطم من عند الخُضري (بقيت اعرف افرق بين الشبت و البقدونس و الكسبرة الخضراء  ).
- مش بتكسف ادخل اشطب الحوض (اغسل المواعين) حتي لو كانت مرة كل فين و فين .. كفاية تنهيدة الراحة و الفرحة اللي اشوفها علي وشها عشان ريحتها من حمل رخم.
- مش بتكسف اساعدها في الغسيل حتي لو حد من الجيران شافني مثلا بنشر او بلم اللبس من علي المنشر .. (متمسكتش في بيت دعارة يعني ).
- مش بتكسف لما ابقي فاضي ادخل اطبخ (رغم اني عملت كوارث في الاول) .. بس اتعلمت من ابويا الله يرحمه اني اساعد امي لما يبقي عندها ظروف او مشاغل في شغلها (عديت مرحلة المكرونة و وصلت للمكرونة البشاميل )

#علي_جنب

(الام / الاخت / الزوجة) مش خدامين عند حد عشان الواحد ببقي قاعد زي البطة البلدي اللي بتتزغط و خلاص , بس لازم برضه الامهات يعلموا ولادهم انهم مش ((سي السيد)) و انه مش عيب انهم يعملوا لنفسهم حاجة و انهم يساعدوا أهل بيتهم و الاهم من ده كله ان لازم شباب كتير يعرفوا انه مش هتقل حاجة من رجولتهم لما يساعدوا و معاملة رسول الله لأهل بيته افضل قدوة حسنة في الموضوع ده.

بقلم : حسين جمال ..